تسلطن غرورك

السلام عليكم ورحمة الله وبركاته


بعد التحيه اليكم



يافكري اللي قام هجسك يدورك
والشوق في قلبي كما ضرب مرواس
اعلن على كل الاوادم نشورك
شعور طايل ينكتب فوق قرطاس
ياملهمة شاعر خياله يزورك
يرسل تحياته مع الشوق هوجاس
عرق الوتين اللي شهد في عبورك
في قلب غنالك قصايد مع الناس
يامبسماً توته يداعب سرورك
والعين فيها حايراً دم جساس
والخد تلعب به جناين زهورك
والنحر شعت به اضاءات الاكباس
ريحة نفسك اليا انتشى به عطورك
اتخشش العاشق فراغات الاقواس
في خطوتك تفرح مع الارض دورك
ويسابقك ظلك يبا يكشف الراس
والليل الاظلم فيه لا لاح نورك
ماضاع في دربه مع الليل عساس
مدلله متدلعه في امورك
طغيان الانثى حولها فصل الباس
ادري بأنه لو تسلطن غرورك
انك مجمع للمشاعر والاحساس
حتى ولو انه تكبر حضورك
ورده وداعبها مع الغيم نسناس
مهما تخفي ياحبيبي شعورك
حريرك اللي منتشر فوقه الماس
اقراء ملامح صورتك في سطورك
يانشوةٍ ترقص على صوت الانفاس
غداك رقه والعشاء مع فطورك
يفرح على ثغرك شرابً من الكاس
اعيون خفاقي تتابع مرورك
ومشاعري في جيتك دقت اجراس
وان كان ابه جرحاً قديماً يجورك
نور الامل في حضرته يذبح الباس
ذا مركبي شفته عبر في بحورك
لا تجعله يبحر على شاطي الياس
ابغى التواصل في معالم جسورك
ياللي على كل الحسن صار نبراس
ارسل على قلب المولع سبورك
ينبوك عن شوقً بلا عد وقياس
قربك غناتي والفلس في دبورك
بُعدك كما بنكً تعرض للافلاس
بغزوك لو تعلن عليه نفورك
بحطم اقلاعك وسورك وحراس
واصير متحكم على باب سورك
اصبح انا الحاكم وقاضي وحباس